BUTUAN CITY – Misaka na sa dul-an usa ka gatus ka mga tawo ang patay sa magnitude 6 nga linog nga mitay-og sa Izmir, Turkey pasado alas-tres sa hapon niadtong Biernes samtang halos usa ka libo na ang natalang angol.
Sa eksklusibong pakighinabi sa Bombo Radyo Butuan kang Meng Timoteo, lider sa Filipino community nga nakabase sa Istanbul City, gibutyag niining ang ila lamang gipasalamatan tungod kay wala’y nadamay nga Pinoy sa maong panghitabo ug luwas ang tanang Pinoy sa maong nasud ilabina sa Izmir.
Kini base na usab sa pagkumpirma ni AMbassador Raul Hernandez kinsa atua sa Izmir City uban sa ubang mga consular officials, sa mismong adlaw sa pag-igo sa linog tungod sa ilang gihimong consular mission.
Apan giklaro niini nga dili kini ang pinakakusog nga linog nga ilang nasinatian tungod kay niadtong 1999, gitay-og usab sila sa magnitude 7.6 nga linog nga miresulta sa pagkamatay sa 17-mil ka mga tawo.
Ang maong ihap, layo sa natala karon nga hapit pa lang sa usa ka gatus ang mga nakalas samtang usa ka libo pa kapin ang grabeng na-angol.
Sa pagkakaron, naglisod matud pa ang mga ospital pag-accomodate sa mga angol tungod sa kadaghan pa usab sa pasyenteng ilang gi-atiman nga positibo sa COVID-19.
Alayon niini duna’y gihimong standard medical protocols ang mga ospital sa Izmir aron padayon ug epektibong matambalan ang mga angol kondiin ang maong siyudad gibisita na sa ilang besil-presidente ug sa health minister aron masigurong mahatagan sila og saktong medikasyon.
