BUTUAN CITY – Malipayong gibalita ni Agriculture Secretary William Dar ngadto sa mga mag-uuma ug mangingisda ning rehiyon sa Caraga ang programang ilang ipatuman alang sa maong sektor.
Kini atol sa iyang pagtambong sa Field Demo and Farmers’ Forum nga gihimo sa Brgy. Lemon ning siyudad sa Butuan subay na usab sa gipahigayong 11th National Rice Technology Forum.
Sa iyang pagpamulong, gipadayag sa kalihim nga ang mga mag-uuma ug mga mangingisda nga wala nakadawat og ayuda sa nasudnong kagamhanan nga gihatag atol sa paghapak sa COVID-19 pandemic, maoy makabenepisyo sa ihatag karon subay na sa na-aprubahang Bayanihan to Recover as One Act kon mas nailang Bayanihan 2.
Gibutyag niining sa Bayanihan to Heal as One Act, mukabat sa 6-bilyunes pesos ang pundong gigahin isip ayuda sa sektor sa mga mag-uumang na-apektuhan sa implementasyon sa Rice Tarrification Law.
Karon, mukabat sa 4.5-bilyunes pesos ang gitagana usab aron hatagan og cash ug food assistance ang mga mag-uuma ug mangingisdang wala nakadawat sa unang ayuda.
