BUTUAN CITY – Nasikop sa mga otoridad ning rehiyon sa Caraga ang 2 ka aktibong miyembro sa Communist-New People’s Army-Terrorist samtang laing 12 usab ka rebelde ang misurender sa sabakan sa balaod human ang gipakusgan pang kampanya kontra insurhensiya.
Giila ni POLICE BRIGADIER GENERAL ROMEO M. CARAMAT, JR, Regional Director sa Police Regional Office 13, ang suspect nga si Jaime Simene, nadakpan atol sa implementasyon sa warrant of arrest sa kasong Multiple Murder og Multiple Attempted Murder nga gi-isyu ni Hon. Catalina Shineta M Tare-Palacio, Acting Presiding Judge sa RTC Branch 32, 10th Judicial Region, San Jose, Dinagat Islands.
Base sa imbestigasyon ang suspetsado nalambigit sa pagpangdani sa mga indigenous peoples og maguuma sa Surigao del Norte nga mosampa sa kalihukan og responsable usab sa paghatud og mga pagkaon sa mga rebelde.
Samtang si Felix Dumali alyas Gaspar/ Pony/ Felix E Dumale nadakpan sa Brgy San Vicente, Sibagat, Agusan del Sur sa nakalabay nga adlaw. Duna kini warrant of arrest sa kasong Murder nga gipalugwa ni Hon. Thelma Bunyi-Medina, Presiding Judge sa RTC, National Capital Judicial Region, Branch 32, Manila.
Nalambigit si Dumali sa gitawag nga “Operation Venereal Disease”, usa ka mass killing ngadto sa mga kaubanang rebelde nga muabot sa dili moubos 67 ka indibidwal niadtong 1985.
Samtang sa Barangay Lydia, La Paz, Agusan del Sur, muabot sa 12 ka rebelding NPA ang mitahan ngadto sa Regional Intelligence Unit 13 kauban ang Provincial Intelligence Team sa Agusan del Sur, La Paz Municipal Police Station, og 1st Agusan del Sur Provincial Mobile Force.
Gi-turned over sa mga niini ang 2 ka Caliber .38 revolver, usa ka Remington caliber .22 rifle, og 2 ka home-made shot guns. Gi-awhag nalang ni RD CARAMAT JR., ang mga nahabiling miyembro sa CPP-NPA nga mopahimulos na sa programa sa gobyerno pinaagi sa pagtahan ug magpakabuhing norma kauban ang ilang pamilya og mga mahal sa kinabuhi.
