BUTUAN CITY – Gipa-ilalom sa tulo ka adlaw nga total lockdown sugod ning adlawa ang Municipal Hall building sa lungsod sa Nasipit, Agusan del Norte human nga duna na’y mga empleyadong nagpositibo sa COVID-19.
Sa gipagawas nga memorandum ni Mayor Enrico Corvera, nakalatid nga padayon ang pagsaka sa mga kaso sa coronavirus sa maong lungsod taliwa sa hugot nga pagpatuman nila sa mga health protocols nga gimando sa Department of Health rason nga duna na sila’y local transmission.
Sulod sa maong mga adlaw himuon ang total disinfection ingon man contact tracing niadtong mga duna’y close contact ug mga secondary contacts sa mga pasyente.
Nanawagan ang mayor sa tanang mga Nasipitnon nga sabton ang ilang kasamtangang sitwasyon kondiin sa adlaw’ng Lunes pa, Oktubre 5 mubalik ang ilang paghatag og serbisyo sa katawhan tungod kay kinahanglan nilang protektahan ang ilang mga empleyadoug katawhan sa kinatibuk-an.
