BUTUAN CITY – Nadakpan ang usa ka samaron nga financial staff sa CPP-NPA terrorists sa checkpoint nga gimontar sa tropa sa gonbyerno sa Brgy Poblacion, Cagwait, Surigao del Sur sa nakalabay nga adlaw.
Gipara sa otoridad ang pula nga multicab nga gisakyan ni Sarvina R. Quijano alyas “Soping”, babaye, 46-anyos, miyembro sa North Eastern Mindanao Regional Committee alas 3:05 sa buntag.
Duna kini samad sa wala nga paa nga gitoohang samad pinusilan. Ang drayber sa multicab nga si Jovencito P. Lozada, 52-anyos, residente sa Brgy. La Purisima, Cagwait ang lakip usab sa gidakop.
Ang hiniusang operasyon sa 1st og 2nd Surigao del Sur Provincial Mobile Force Companies, Cagwait Municipal Police Station, og Delta Company sa 7th Special Forces mihatag og tip nga dunay samaron nga miyembro sa NPA ang dalhon gikan sa lungsod sa Marihatag ngadto sa Tandag City, Surigao del Sur aron patambalan.
Nakumpiska gikan sa suspetsado ang duha ka bag nga dunay sulod nga tulo ka riffle grenades, improvised explosive device, memory cards, sim cards, og subersibong dokumento.
Sigon ni Police Regional Office 13 director Briger General Joselito T. Esquivel, Jr, mag-atubang sa kasong paglapas sa R.A. 9516 kon Illegal Possession of Explosive ang suspetsado samtang imbestigahan kung kini nasamdan ba atol sa giyera sa tropa sa gobyerno batuk sa mga rebelde.
Gipasalamatan usab sa opisyal ang suporta gikan sa mga sibilyan nga mihatag og impormasyon sa tropa sa gobyerno.
