BUTUAN CITY – Gipaniguro sa otoridad nga panubayan nila ang tanang indibidwal nga dunay kalambigitan sa pagtago -tago ni KAPA founder Joel Apolinario.
Imbestigahan sa Special Investigation Task Group (SITG) Apolinario si Mayor Roberto ‘Jimmy’ Luna jr. sa Lingig, Surigao del Sur aron masayran ang kalambigitan niini sa Kabus Padatoon (KAPA) Community Ministry International Incorporated ilabina kang KAPA founder Joel Apolinario.
Sa eksklusibong intervirview sa Bombo Radyo Butuan, gipadayag ni PLtCol. Choli Jun Caduyac, regional chief sa Criminal Investigation and Detection Group (CIDG) Caraga, adtuan nila karong Lunes o bisan unsang adlaw sunod semana ang lungsod sa Lingig diin nadakpan si Apolinario ug lain pang 25 niini ka mga alipores apil ang ilyang asawang si Reyna.
Kini aron ma-apil sa imbestigasyon si Mayor Robert ‘Jimmy’ Luna jr. sa ingon masayran ang koneksyon niya kang Apolinario ilabina human nasayran nga ang yutang gitarukan sa iyang komunidad ilabina sa iyang resort, nakapangalan kaniya.
Dugang pa ni Caduyac, apil sa ilang imbestigahan kung sa unsang paagi naka-establisar ni Apolinario og private armed group human nakumpiska gikan sa guard house niini human sa engkwentro, ang grabe kadaghang mga short ug high-powered firearms apil na ang nagkada-iyang klase sa mga bala ug mga war materials lakip na ang rocket propelled grenade.
