BUTUAN CITY– Gipanghimakak ni Surigao del Sur Police Provincial Director PCol. James Goforth ang nanggawas nga mga hungihong nga wala matud pa misukol kanila ang mga armadong sakop ni KAPA founder Joel Apolinario.
Sa eksklusibong pakighinabi sa Bombo Radyo Butuan, gipadayag ni Col. Goforth nga tungod sa hugot nga resistance nga gipakita sa mga bodyguards ni Apolinario, milungtad og kapin duha ka oras ang binakbakay sa armas.
Tungod kay ka-highly trained ug well-equipped ang mga pulis nga apil sa operasyon ug nakaposisyon pa sa mga estratihikong lugar sa bukid, dagat og mismong bisinidad sa resort, rason nga wala ma-mobilize ang mga tawo ni Apolinario.
Nalikayan usab ang posibleng daghang casualty tungod kay planado kaayo ang maong operasyon nga niadto pang Disyembre ning mi-aging tuig gihimo sa Regional Special Operations Group pagpanguna ni Police Regional Office kon PRO-13 regional director PBGen. Joselito Esquivel Jr.
Gidugang pa ni Col. Goforth nga dili sayon ang ilang operasyon ilabina nga usa ka gabiing nagsugok-sugok sa lasang ang ilang mga sakop aron lang dili makamatikod ang mga bodyguards ni Apolinario.
Gawas pa kini sa iyang ubang mga sakop nga anaa sa dagat usab mihumol ug uban pang parte sa maong resort hangtud nga napalibutan nila kini.
