BUTUAN CITY – Consensus matud pa sa tanang 28 ka mga membrong bangko sa Butuan Bankers Club ang pagpakunhod na lang ngadto sa tag-upat ka oras kada-adlaw sa ilang banking hours.
Kini human ang ilang panagtigom kagahapon sa ingon ma-mitigate ang risgong hatud sa padayong pagdaghan karon sa mga kaso sa COVID-19 dinhi sa siyudad ilabina nga duna na’y local transmission niini.
Sa eksklusibong pakighinabi sa Bombo Radyo Butuan, gipadayag ni Louj (lu) Dadong, presidente sa Butuan Bankers Club, kinahanglan nilang ikonsidera ang kaluwasan sa ilang mga bankers kon mga trabahante sa bangko aron dili ma-apektuhan ang ilang operasyon nga maoy mahitabo kung masutang duna’y usa sa ilang mga personnel ang magpositibo sa COVID-19.
Kung kini mahitabo, sigurado matud pang ma-apektuhan ang ilang kliyente tungod kay ma-apektuhan man usab ang ilang pagserbisyo.
Ubos sa gikunhurang banking hours, giklaro pa sa opisyal nga pabiling sundon ang mga health protocols uban sa pag-awhag sa publiko nga kinahanglang humanan ang ilang transaksyon sulod sa maong banking hours.
Gawas sa pagpakunhod sa ilang banking hours, wala matud pa’y angayang kabalak-an ang ilang mga kliyente kung sila mag-transact tungod kay hugot nga seguridad ang ilang gipatuman dili lang sa natad sa panglawas.
Kini aron mawala ang kabalaka sa mga mu-transact kanila sa posibleng mga dautang lihok sa mga lawless elements ilabina kadtong daghan ang wala’y trabaho human na-apektuhan sa COVID-19 pandemic.
