BUTUAN CITY – Migawas na ang ikatulong hugna sa Covid-19 sample gikan sa Caraga diin ang mga niini negatibo.
Kaganinang buntag lang nadawat sa Department of Health kon DOH Caraga ang resulta sa samples nga gipadala didto sa Southern Philippines Medical Center kon SPMC.
Ang tanang lima ka samples nag-test negative sa COVID-19. Mahinumdumang kagahapong adlawa, dunay 20 ka nagpabiling Persons Under Investigation kon PUIs ang natala diin pito ang kasamtangang na-admit sa ospital ug ang 12 anaa sa estriktong home quarantine.
Mahinumdumang sa unang hugna negatibo ang usa ka sample samtang sa ikaduha, siyam ka sample ang pulos negatibo.
Tungod niini, nagpabiling covid-19 free ang rehiyon sa Caraga.
Sumala pa ni Regional Director Jose R. Llacuna, Jr bisan paborable ang resulta wala kini nagpasabot nga kita magpakampante na. Dunay daghan pang kinahanglang buhaton aron mapug-ngan o maminusan ang pagkuyanap sa sakit.
