BUTUAN CITY – Dili na gayod kapugngan ang pag-arangkada sa Public Utility Modernization Program kon PUVMP dinhi sa rehiyon sa Caraga.
Sa eksklusibong pakighinabi ning sibyahan kay Maria Kristina Cassion, ang OIC –Regional Director sa Land Transportation, Franchising and Regulatory Board kon LTFRB-CARAGA, gibutyag sa opisyal nga padayon ang ilang pakigkoordina ngadto na sa mga drivers og operators aron kini ilang matabangan sa pagpamembro sa usa ka kooperatiba.
Kanunay nilang gidasig og gipasabot ang mga niini sa kaanindot sa programa nga gimugna alang kanila.
Ila matod pang paningkamutan nga bulan sa Hunyo 2020 wala nay magdagan nga mga NON-Compliant units , subay na usab sa panawagan sa Department of Transportation kon DOTr.
Ning rehiyon sa Caraga nasayod na matod pa ang mga operators og drivers nga ma phase out na kini sa June 2020.
Samtang gibutyag sa opisyal nga duna nay bag-ong mga unit nga magdagan Butuan to Nasipit and vice versa nga magsugod sa 7 ka mga unit karung umaabot nga Lunes pinaagi sa kompanyang Diamond Transport Service Cooperative kon Datsco.
Lakip na usab sa Langihan to Amparu pinaagi sa Balangay Transport Service Cooperative sunod bulan, Marso ingon man ang magdagan diha sa may Bonbon Capitol Road padulong sa Langihan.
Kini nga mga unit ang mga electronic og Euro 4 complaint diin comportable ang mga pasahero og luwas nga maka-abot sa ilang padulngan.
Ang PUVMP dili lamang vehicle modernization program. Usa kini ka comprehensive system reform nga magbag-o sa katibuk-ang public land transportation industry.
Kini usab ang pinakadakong non-infrastructure project sa administrasyon.
