BUTUAN CITY – Libuang mga residente na gikan sa lungsod sa Lemery og Agoncillo sakop sa probinsya sa Batangas ang nanghikling tungod sa padayong pag alburoto sa Bulkang Taal.
Sa eksklusibong pakighinabi sa Bombo Radyo Butuan kang Alyas “Lorrie”, nihikling na usab ang iyang pamilya sa Boron Batangas diin mas luwas matod pa tungod napasalipdan sila sa Mt. Maculot.
Gikabutyag niini nga puno na ang mga tulonghaan nga maoy nagsilbing evacuation center sa mga nikagiw nga mga residente.
Gisirado na usab ang mga nag unang kadalanan sa probinsya tungod sa kalisud sa kahimtang hatod sa ash fall.
Gawas sa nag alburotong bulkan gikabalaka usab sa mga residente ang posibilidad sa tsunami tungod sa kalit nga pag atras sa tubig sa dagat ingon man ang mga pagtay-og nga masinati sa halos kada minuto.
Pagbutyag niini nga sa 47 ka Bulkan sa Taal Volcano dili pa matumbok sa otoridad kung pila og unsa sa mga niini ang aktibo.
Tungod sa kapino sa buhangin nga gibuga sa bulkan dilikado matod pa kini sa panglawas sa katawhan hinungdan nga iyahay ang mga niini sa pagpalit og masks sa mga nag unang parmasya sa ilang lugar.
Sa pagkutlo ning balita nihupa na matod pa ang pag ulan og malaumon ang mga niini nga mohunong na ang pag alburoto sa bulkan og dili na masundan pa ang phreatic eruption sa bulkang taal.
