BUTUAN CITY – Pabiling normal ang panginabuhi sa mga Pinoy nga atua sa nasud nga Iran bisan paman sa tensiyon tali sa maong nasud og sa Estados Unidos.
Kini ang gikumpirma sa Overseas Filipino Workers kon OFW nga si alyas Hussein nga taga Cotabato City og nagtrabaho sa maong nasud sa eksklusibong pakighinabi ning sibyahan.
Sumala pa ni Hussein, normal ang estado sa mga OFW sa Iran diin duna gihapoy klase, dunay trabaho, walay holiday og walay alert level nga gipataas.
Apan nakadawat na sila og pahimangno gikan sa embahada sa Pilipinas diin dunay evacuation plan ugaling moulbo ang giyera.
Samtang gipadayag usab sa OFW nga wala siya mibati og kabalaka tungod kay gipamahayag man sa gobyerno sa Iran nga dili sila mangeta og giyera hinoon mobalos lang sila sa pagkamatay kang Gen. Qassem Soleimani.
Apan gipaneguro sa gobyerno nga siento porsiento silang andam ugaling mahitabo ang gubat.
Sa karun, tinguha sa Iran nga pahawaon ang tanang US Military base sa middle east.
Sa laing bahin, pPabiling kalmado ang pipila ka mga Overseas Filipino Worker kon OFW sa nasud nga Iraq taliwa sa nahitabong pag ataki sa nasud nga Iran.
Sa eksklusibong pakighinabi sa Bombo Radyo Butuan kang Bombo International Correspondent Ruby Los Baños, giangkon niini nga bisan layo ang ilang lokasyon sa gi ataki sa retaliation missiles sa Iran gibati gihapon nila ang pag tay-og sa lupa tungod sa kakusog sa bomba.
Gikabutyag usab ni Los Baños nga subsob ang panawagan karon sa embahada sa Pilipinas nga anaa sa nasud nga Iraq sa mga OFW nga gustong mopauli o mag evacuate tungod sa gikabalak-ang gyera.
Sa pagkutlo ning balita padayon ang normal nga kinabuhi og trabaho sa mga Filipino sa maong nasud.
Nasayrang 20 ka tuig nang nagtrabaho si Los Baños sa Iraq, kalmado usab ang ilang mga employer tungod kampante matod pa ang mga niini nga dili basta basta madaog sa Iran ang kurdish force sa nasud nga Iraq.
Sa pikas bahin padayon silang naniid karon sa kahimtang aron sa ilang paghikling.
