BUTUAN CITY – Kumbinsido ang pamilya sa tricycle driver nga walay foul play ang kamatayon niini human nagtubok kaganinang mga alas 2:00 sa hapon sa may Purok-3 Sabang, Barangay 3 sakop sa siyudad sa Cabadbaran, Agusan Del Norte.
Nasayran nga nahimong mangil-ngig ang pagpakamatay sa biktimang si Jimmy Tagaylo Jampit, 52-anyos, olitawo nga residente sa maong dapit, diin gamit ang kutsilyo, giluba-luba niini ang kaugalingon og nangaputol pa ang tina-e niini.
Sa pakighinabi ning sibyahan kang Police Master Sergeant Harols Osa, Imbestigador sa Cabadbaran City Police Station, nakadawat sila og taho gikan kang Ricky Careras mahitungod sa pagtubok sa biktima.
Sumala pa ni Osa, nitukar ang depression sa biktima diin mikuha kini og kutsilyo didto sa ilang kusina adiser misulod sa kwarto ug didto giluba ang iyang tiyan.
Migawas ang biktima sa kwarto nga nagkadugo na ug didto sa gawas sa ilang balay gipadayon ang pagluba sa kaugalingon nga maoy hinungdan sa pagkaputol-putol sa iyang tina-e.
Buhi pa nga na-abtan sa mga rescuer ang biktima nga daling gidala sa Cabadbaran District Hospital apan nakabsan kini sa hinulamang kinabuhi.
Migawas sa imbestigasyon nga dunay kapuyo kaniadto ang biktima apan gibiyaan siya niini nga maoy sinugdanan sa iyang depression.
