BUTUAN CITY – Gideklara nang drug-cleared sa Barangay Drug Clearing Program Regional Oversight Committee kon BDCP-ROC-Caraga ang lalawigan sa Agusan del Norte, ang Cabadbaran City ug ang 33 ka mga barangay ning siyudad sa Butuan.
Kaganinang alas-10:34 sa buntag gihimo ang deklarasyon sa conference room sa Philippine Drug Enforcement Agency kon PDEA-Caraga Bldg. sa Brgy. Libertad ning siyudad sa Butuan uban sa pito gikan sa napulo ka mga membro sa komite.
Sigon ni Dindo Abellanosa – information officer sa PDEA-Caraga, gihimo ang deklarasyon human ang taas ug kuti nga proseso sa deliberasyon sa barangay drug-clearing operation.
Ang mga lungsod sa Magallanes, Buenavista, Kitcharao, Nasipit, ug Santiago, pulos sakop sa Agusan del Norte, gideklara usab nga mga “drug-cleared” municipalities.
Tungod niini nga development, 87.04-porsiento na sa mga barangays sa Caraga Region ang gideklarang “drug-cleared” ilabina nga mi-abot na sa 1,141 gikan sa 1,311 ka mga barangays ang na-confer sa “drug-cleared” status.
