BOMBO BUTUAN – Misumbong sa Bombo Radyo ang usa ka pulis nga nadestino sa Cabadbaran City, Agusan del Norte human kini na-trap ug 2 ka oras sulod sa pansayan sa usa ka hotel sa may Brgy Carmen, Cagayan De Oro City.
Naila ang reklamanteng si Police Senior Master Sergeant kon PSMS Apollo Paquibot nga nadestino sa Cabadbaran City Police Station.
Saysay pa sa pulis atol sa Bombo Butuan-Cagayan connection kagahapon, mi-adto siya sa Cagayan De Oro City aron magpa-authenticate sa iyang lisensiya ngadto sa Civil Service Commission rasong mi-check in siya sa usa ka hotel.
Pasado alas 6:00 sa buntag dihang siya migamit sa pansayan aron maligo apan hilabihan na lang ang iyang katingala kay dili naman ma-abli ang pultahan.
Na-abtan pa siya og duha ka oras pagpangita og paagi aron lang makagawas hangtud nga nakakita siya og puthaw nga maoy iyang gigamit sa pagguba sa door knob.
Bisan pa man sa iyang hilabihang pagkadismaya, wala gihapon siya’y planong magpasaka ug kaso o kaha magpa-refund apan gitambagan ang maong hotel ipa-repair na kini aron wala na’y mabiktima pa.
Samtang sa kabahinan sa kadumalahan sa maong hotel, nasayrang 20 ka tuig na diay ang gidugayon sa ilang mga door knobs rason nga nangayo sila ug dispensa sa maong pulis.
