BUTUAN CITY – Nagpatala sa Butuan City Police Station 3 ang usa ka lalaking bag-ong kasal aron ireklamo ang wala matud pa sa plano og pugsanong pagpakasal kaniya ngadto sa iyang hinigugma.
Sigon sa 27-anyos nga si alyas Abdul, residente sa usa ka barangay ning siyudad sa Butuan, gidagit matud pa siya sa lima ka mga lalaking kabanay sa iyang hinigugmang taga-Buenavista, Agusan del Norte.
Gi-adtuan siya sa ilang panimalay og pugsanong gipasakay sa kolor yellow nga multicab pasado alas-singko ning mi-aging hapon og gidala sa pinuy-anan sa iyang hinigugma.
Nakurat na lang siya dihang nakita niyang duna na’y gi-andam alang sa kasal og pagkasunod adlaw, gidala silang duha sa iyang hinigugma ngadto sa usa ka moske ning siyudad diin sila gikasal ilalom sa Muslim wedding ceremony.
Tungod kay gipalibutan sa mga kabanay sa iya nang asawa, wala makabalibad ang lalaki rason nga pagka-ugma na siya midangop gilayon siya sa kapulisan aron ipatala ang maong hitabo kansa supak sa iyang kabubut-on.
