BUTUAN CITY – Human ang siyam ka tuig nga pagserbisyo, hingpit nang miretiro sa iyang trabaho ang usa ka rescue dog kinsa nakakuha og international fame tungod sa iyang mabayanihong gihimo atol sa kusog nga linog sa Mexico niadtong tuig 2017.
Nagpahigayon og seremonya ang Mexican Navy canine unit aron pasidunggan si Golden Labrador Frida.
Nalambigit si Frida sa 53 ka mga rescue operations sa Mexico, Haiti, Guatemala og Ecuador.
Gipasidunggan sa navy si Frida tungod sa iyang pagluwas sa kinabuhi sa 12 ka mga tawo og pagkakaplag niya sa laing 40 ka mga patay’ng lawas.
Sigon ni Deputy Naval Minister Eduardo Redondo, ang matag-aw aw ni Frida naghatag og paglaum og sa panahon sa kasakit og kawala’y klaro, makahatag siya og kahupayan.
Ang mga imahe ni Frida nga nagsuot og protective eye mask, samtang nagsuhid sa mga tipaka sa nahugmak nga tunghaan sa Mexico City, mikuha sa atensyon sa tibuok kalibutan og nahimong simbolo sa paglaum alang sa Mexico human ang linog nga mikalas og kapin 300 ka mga tawo.
Karon nga nag-edad na siya og 10-anyos, ang iyang mga handlers mibitay na sa iyang sikat nga mask og boots og gihatagan siya og chew toy alang sa sunod nga kapitulo sa iyang kinabuhi.
