BUTUAN CITY – Gipasaligan ni Pastor Joel Apolinario – founder sa Kabus Padatoon kon KAPA International Community Ministry ang iyang membro nga dili mabalaka sa mando ni Pangulong Rodrigo Duterte nga pasirad-an na sila.
Kini sa rasong duna matud pa’y konkretong mga papeles ang ilang religious organization kansa sukwahi sa gihingusgan sa Securities and Exchange Commission kon SEC rason sa ilang gipagawas nga cease and desist order.
Sigon ni Apolinario, wala matud pa’y angayang kabalak-an ang iyang mga sakop sa rasong mopasulabi gyod ang Freedom of Religion.
Ang gisulti matud pa ni Pangulong Duterte alang man sa tanan, kondiin suko siya anang matud pa 100% ngadto 500% nga tubo sa kwartang wala’y source nga kakuhaan.
Sila, daku matud pa kaayo ug negosyo nga kakuhaan ug makasustinir rason nga wala’y makapasira kanila gawas kon gisi-on nila ang Philippine Constitution nga nag cover sa religious freedom.
Kung harason matud pa sila, anaa ang balaud, og anaa usab ang injunction nga kung dili matud pa respitohon, musangpot na sa pagpasaka ug kaso nga contempt of court, harassment, abuse of authority, administrative case ingon man civil case.
Alayon niini, nanawagan siya sa mga membro nga dili mahadlok ug dili maghagudhod pag-withdraw sa ilang gi-donate sa matag-branch.
Dugang pa ni Apolinario, ang KAPA dili matud pa pyramiding scam ug mituman sila sa pamalaud taliwa nga wala mulipang ang iyang operasyon sa Surigao City human kini gipa-imbestigahan sa local government samtang hingpit usab nga gipasira ang ilang operasyon sa Bislig City pinaagi sa pagpanghingusog ni outgoing Mayor og incoming Surigao del Sur Vice Governor Librado Navarro.
