BUTUAN CITY – Gipasakaan na og kasong murder pinaagi sa inquest proceedings ang duha sa tulo ka mga lalaking mitigbas sa duha ka mga dayo sa may Langihan Road, Brgy. San Ignacio ning siyudad sa Butuan human nadakpan sa gilusad nga manhunt operation.
Gi-ila ni PCapt. Emerson Alipit, tigpamaba sa Butuan City Police Office, mga biktimang sila Jericho del Rosario-Gabriel, 36-anyos, residente sa Tagoloan, Misamis Oriental og Clifford Pangara, 31-anyos, residente sa lungsod sa Talisayan, Misamis Oriental kinsa naka-angkon og mga samad-tinigbasan sa nagkada-iyang parte sa lawas apan luwas na human nadala sa ospital.
Samtang ang mga suspek usab nailang sila Mel Jacob Tito, residente sa Brgy. San Ignacio og Cyril John Tolentino nga residente usab sa Brgy. Taguibo ning siyudad.
Daling nasikop sa SWAT ang nanibat nga mga responsable tungod sa padayong roving og nakuha gikan sa ilang posisyon ang duha ka mga sundang.
Migawas sa ilang imbestigasyon nga nagkabikil matud pa ang grupo sa mga biktimang nag-inom ngadto sa grupo usab sa mga suspek kinsa nanguli apan gibalikan ang mga dayo og gipanigbas.
