BUTUAN CITY – Human mi-ani og moral og spiritual support sa iyang mga fans og mga followers dili lang sa social media kondili apil na sa mga tigpaminawan sa Bombo Radyo Philippines nga nasayod na sa tinuod nga nahitabo kaniya, pursigido karon ang roomboy nga mubali pagpasaka og kasong rape batuk sa babayeng kliyente sa gitrabahuan niyang lodging house.
Kini may kalabutan na sa kontrobersyal nga pagpasaka kaniya og kasong rape sa maong babaye taliwa sa kamatu-urang ang nasangpit nga kliyente maoy misulod sa kwarto diin siya mipahulay og didto gi-ulan og romansa hinungdan sa pila ka minuto nilang sexcapade.
Sigon ni Albert Caerlang nga residente sa lungsod sa Alegria, Surigao del Norte, ang serbisyo sa private lawyer ang plano niyang kuhaon aron maseguro ang iyang kada-ugan.
Hugot usab niyang gibarugan nga wala’y rape nga nahitabo tungod kay ang maong babaye matud pa ang unang mikamang kaniya human nasayop og sulod sa kwarto diin sila nag-checkin sa iyang boyfriend.
Aminado siyang kini unya ang unang higayon dinhi sa Caraga Region nga duna’y lalaking mupasaka og kaso rape batuk sa usa ka babaye og pursigido siyang dag-on kini alang na usab sa uban pang mga lalaking duna’y susama kaniya og kasinatian apan nagpakahilom lang og aron usab malimpyuhan ang iyang pangalan.
