BUTUAN CITY – Patay ang barangay kagawad og ang kanhi treasurer sa Brgy. San Pedro sa lungsod sa San Luis, Agusan del Sur samtang laing tulo ang angol human ang natigayong pagpamusil sa wala pa mailang responsable kaganinang buntag.
Naila ang mga namatay nga sila Kagawad Susan Mandumutan og Maricel Quezon, residente sa maong barangay samtang ang mga angol usab nailang sila Franklin Mandumutan – bana sa namatay nga kagawad og kasamtangang konsehal sa maong lungsod, ilang 8-anyos nga anak nga lalaki, og si Nore Coguit, 19-anyos, anak sa kanhi konsehal usab sa maong barangay.
Sigon ni Police Staff Sergeant Reynalyn Batol – information officer sa San Luis Municipal Police Station, padulong unta matud pa sa political rally sa Brgy. San Alejandro ang mga biktimang sakay sa Isuzu Ertiga nga gmanehuan ni Sangguniang Bayan kon SB member Franklin Mandumutan.
Posible matud pang gi-atangan og tuyo ang mga biktima rason nga pag-abot sa awa-aw nga bahin sa quarry site sa Purok 1, Brgy. San Pedro, didto na gipa-ulanan og bala sa M16 armalite rifle ang ilang sakyanan. Dali pang nakatawad sa police station si SB member Mandumutan og gitaho ang ilang nadangatan.
Dugang pa ni Staff Sgt. Batol, gisuta pa nila kung kinsa ang mga responsable og unsa ang motibo niini tungod kay dili man matud pa magpa-reelect ang konsehal sa maong lungsod. Apil usab sa ilang sutaon kung duna ba’y nadawat nga hulga sa kinabuhi ang mga biktima.
