BUTUAN CITY – Hingpit nang napasakaan og kasong paglapas sa Republic Act 10591 ang mga opisyal sa nagkada-iyang local government units ning rehiyon nga nadakpan og nakuhaan og mga dili lisensyadong armas og mga bala.
Kini human ang gipahigayong ‘One Time Big Time’ operation sa Criminal Investigation and Detection Group kin CIDG-Caraga pagpanguna ni Police Leiutenant Colonel Cholijun Caduyac bitbit ang mga search warrants tungod sa illegal possessions of firearms.
Apil na niini si incumbent Tagbina, Surigao del Sur Vice Mayor Antonio Numberon Adlao, residente sa Purok 2 Brgy. Malixi, kinsa nakuhaan og usa ka kalibre .38 nga revolver uban sa walo ka mga bala niini, uban sa lain pang mga bala sa nagkada-iyang klase sa armas og us aka kalibre 45 nga pistol.
Nakasuhan na usab ang mayor sa lungsod sa Tubajon, Dinagat Islands province, residente sa Purok 1, Brgy. Santa Cruz, kinsa nakuhaan og usa ka caliber 22 magnum uban sa mga bala ingon man magazines og usa ka airgun nga wala’y markings og mahimong ma-convert ngadto sa caliber 22.
Nadakpan usab si Tubajon, Dinagat Islands Sangguniang Bayan kon SB member Norlilto Rubio Ticod didto sa iyang pinuy-anan sa Brgy Puerto Princesa, og nakuha gikan sa iyang posisyon ang duha ka kalibre .45 nga pistol apil na ang mga bala og usa ka holster niini.
Katapusang nadakpan si Kapitan Robert Lamatao sa Purok 1, Brgy. Buenasuerte, lungsod sa San Francisco,Agusan del Sur human nakuhaan og us aka kalibre .38 nga revolver uban sa mga bala niini og usa ka kalibre .45 nga pistola uban usab sa mga bala niini og magazines ingon man holster.
