BUTUAN CITY – Mi-abot na karon sa 617 ang kaso sa tipdas nga natala sa Department of Health kon DOH dinhi sa Caraga Region, base na sa mga na-admit sa nagkada-iyang disease reporting units ning rehiyon gikan niadtong Enero 1 hangtud ning bulan sa Marso ning tuiga.
Kini mas taas og 757-porsiento kumpara ngadto sa natalang 72 ka mga kaso sa susamang mga bulan ning mi-aging tuig.
Ang maong pagsaka natala taliwa sa mas gipakusgang kampanya sa DOH-Caraga apil na sa pagpamakunang ilang gihimo ngadto sa local level sukad pa niadtong buwan sa Enero.
Sa kinatibuk-an, mi-abot na sa 214-mil, 480-pesos ang salaping cash nga nagamit sa halos duha ka buwang gilusad nga mga measles response activities sa nasangpit nga regional office.
Apil na niini ang transportation og meals allowances sa mga vaccinators, monitors og advocacy teams.
Samtang mi-abot usab sa 16-milyunes, 148-mil, 649-pesos nga balor sa mga bakuna og kagamitan ang nagamit sa ilang immunization activities aron masuplayan og ma-abunuhan ang gikinahanglan sa mga local government units sa tibuok rehiyon.
Gawas niini, mi-abot usab sa 40 ka mga volunteer nurses gikan sa Surigao City ang misaad nga mu-abag sa mop-up vaccination adtivities sa maong dakbayan.
Kini gawas pa sa 165 ka mga nurses nga gikuha og gipakatag sulod sa usa ka buwang supplemental immunization activities.
Nasayrang ang tipdas usa ka sakit nga maoy hinungdan sa grabeng mga komplikasyon apil na niini ang pneumonia og meningitis nga mahimong musangpot ngadtp sa kamatayon ilabina sa mga batang mataptan niini nga nag-edad og 5-anyos pa-ubos apan malikayan kini pinaagi sa pagpabakuna.
