BUTUAN CITY – Padayon pang gipangita sa mga rescuers sa lungsod sa Mainit, Surigao del Norte ang usa ka 6-anyos nga batang lalaki kinsa na-missing human gi-anod sa kusog nga bul-og sa tubig-baha kagahapon dihang gisung-ay sa iyang apuhan samtang mitabok sa suba.
Kini human usab nga napalgan na kaganinang alas-sais sa buntag ang 62-anyos nga apuhan niining si Danilo Dahilan, residente sa Brgy. Sta. Cruz, lungsod sa Placer, Surigao del Norte.
Sigon ni Kagawad Carlos Gubac sa Brgy. Matin-ao, lungsod sa Mainit, Surigao del Norte, naka-abot sa ilang lugar ang biktima uban sa apo niining si Torex, iyang asawa og laing duha ka kabanay human gisuhulan aron mangopras og lubi.
Sa eksklusibong pakighinabi sa Bombo Radyo Butuan, pa-uli na matud pa ang pamilya Dahilan pasado alas-kwatro kagahapon sa hapon apan nagduha-duha tungod sa kusog nga bul-og sa tubig baha diha sa daang suba.
Midesisyon si Danilo nga tabukon ang suba samtang gisung-ay ang apo apan gi-anod sila rason sa tibuok gabiing pagpangita hangtud nga napalgan siyang nasangit sa may Mayag samtang padayon pang gipangita ang 6-anyos niining apo. (Beth Ruiz)
