BUTUAN CITY – Duha ka adlaw nang nabibo ang baybayon sa Brgy. Masao ning siyudad sa Butuan tungod sa midaghang mga baga kaayong panon sa uyabang.
Sigon ni Brgy. Kagawad Felix Lariba, chairman sa Committee on Public Order sa Sangguniang Barangay, nakuratan na lang siya dihang sa iyang pag-roving kagabii, nagtapok ang mga residente sa baybayon og nag-iyahay og kuha og uyabang gamit lang ang suot nilang t-shirt.
Gani, hangtud sa pagkutlo niini nga balita kaganinang buntag, bisan ang mga nangaligo, nabibo usab pagpanguha og uyabang gamit ang ilang pinutol nga moskitero kansa maoy gigamit nilang pulutan human nila kini gikilaw.
Nasayrang mas daghang panon sa uyabang ang mudagsa sa ilang baybayon panahon sa kagabhi-on og sa kaadlawon ilabina kung tungnan sila og suga.
Tungod sa kadaghan sa maong mga uyabang, mangabot na sa buhangin ang uban rason nga mangamatay. (Beth Ruiz)
