BUTUAN CITY – Malampusong nasakmit sa ginsakpan sa Philippine Drug Enforcement Agency kon PDEA-Caraga ang gibana-banang muabot sa 95.2 milyones pesos nga kantidad sa shabu nag gisulod sa ligid sa sakyanan sa operasyong gihimo sa Lipata Ferry Terminal sa Barangay Lipata, Surigao City kaganinang sayu sa buntag.
Nadakpan usab ang suspek nga nailang si Sultan Kinento, 23 anyos ug residente sa Taguig, Metro Manila. Base sa taho gikan sa Surigao City Component Police Station–Drug Enforcement Unit, nakadawat sila og impormasyon kagahapon sa alas 5:19 sa hapon mahitungod sa usa ka Toyota Hilux pick-up nga dunay plate number NFE 4104 nga gikan sa Cotabato ug nagkarga sa illegal nga droga padulong sa Surigao City pinaagi sa RORO vessel.
Nakig-alayon sila sa mga loaw enforcement units sama sa 1st Surigao del Norte Provincial Mobile Company, Maritime Police, Regional Intelligence Office (RIO), Criminal Investigation and Detection Group (CIDG), Philippine Ports Authority (PPA) ug Philippine Coast Guard alang sa interdiction operation.
Pasado alas 11:32 na sa gabii namatikdan ang sakyanan sa Lipata Ferry Terminal ug gipa-hold alang sa verification. Gisundan kini sa plain view search og K9 sweeping pinaagi sa sniffing dogs sa PDEA ug Coast Guard og didto nadiskubre nga gitago sa ligid sa sakyanan ang illegal nga droga.
Gitabas nila ang ligid ug didto nakuha ang 14 ka bloke sa transparent cellophane nga dunay sulod nga shabu nga mitimbang og 14 kilos.
Sa kasamtangan ang suspetsado lakip na ang nakumpiskang mga ilegal nga drogas lakip ang sakyanan ang gikustudiya sa Philippine Drug Enforcement Agency alang sa tukmang disposasyon samtang gi-andam ang kasong ipasaka batuk sa suspetsado.
Sa nahimong pamahayag ni Philippine Drug Enforcement Agency kon PDEA-Caraga Regional Director Laurifel Gabales nga dili kini mahimo kung walay pagtinabangay sa tanang hingtungdang ahensiya.
