BUTUAN CITY – Emosyunal atol sa iyang pagretiro isip grave digger kon tigkalot og lubnganan, ang 92-anyos nga si Allen McCloskey sa Galveston Cemetery sa Galveston, Indiana tungod kay nakab-ot usab niya ang Guinness World Record title isip ‘longest gravedigger’ nga maoy iyang trabaho sulod sa 73 ka mga tuig ug 75 ka mga adlaw.
Nasayrang nagsugod sa iyang trabaho si McCloskey niadtong 1952 dihang gihangyo siya nga mupuli sa lokal nga tigkalot og lubnganan sulod lamang sa usa ka semana.
Ang temporaryong trabaho nga nagsugod pinaagi sa mano-manong pagkalot sa lubnganan, nahimong iyang panginabuhian sulod sa daghang dekada.
Nakab-ot ni McCloskey niadtong 2021 ang Guinness World Record isip pinakataas nga nagserbisyo nga tigkalot og lubnganan sa kalibutan human makatrabaho og 68 ka mga tuig ug 191 ka mga adlaw.
Gikumpirma sa iyang anak nga si Dean McCloskey nga opisyal nang miretiro ang iyang amahan niadtong Nobyembre 2025 human nga gilugwayan pa niini ang iyang rekord ngadto sa 73 ka mga tuig ug 75 ka adlaw.
Gipasabot ni Dean sa usa ka Facebook page nga gipahinungod sa trabaho sa iyang amahan nga nagplano pa unta kini nga magpadayon sa pagkalot sulod sa pipila ka semana, apan nakadesisyon nga mohunong tungod sa iyang panglawas dala usab sa iya nang katigulangon.
