BUTUAN CITY – Nahurot og ka-admit sa Butuan Medical Center ang siyam ka membro sa usa ka pamilya human nahilo sa ilang gisud-ang tinai sa manok nga napalit kagabii pa apan kaganinang buntag pa nasud-an.
Naila ang mga biktima nga mao ang magti-ayong Jocelyn Matulin, 39-anyos og ang 63-anyos nga bana niiining si Rogelio Matulin Sr., pulos residente sa Purok 6, Brgy. Antongalon ning siyudad. Apil sa nangahilo ang ilang pito ka mga anak nga nailang sila Phoebe Marie, 17-anyos; Rosemarie, 14-anyos; Shiela Marie – 13; Jomari – 6; Anna Marie – 10; Phil Marie -4-anyos og ang 2-anyos nga si Rogelio Jr.
Sigon sa inahang si Jocelyn, napalit sa iyang bana ang halang-halang nga tinai sa manok kagabii kansa wala nila masud-an tungod kay nag-overtime man kini sa iyang trabaho.
Iya matud pa kining gi-init kaganinang buntag og maoy ilang gisud-an hangtud nga inanay na lang milabad ang ilang ulo, nalipong, naluya, nagsuka-suka og balik-balik nga nagpagawas sa ilang hugaw sa pansayan.
Nakapangayo pa sila og tabang sa ilang silingan apan pulos na sila nakuyapan og didto na sila nabalikan sa ilang panimuot pag-abot sa ospital. (Beth Ruiz)
