BUTUAN CITY – Gi-isip nga bayani karon ang usa ka 9-anyos nga batang lalaki human giluwas ang nalumos nga kaduwang 7-anyos nga batang babaye samtang nangaligo sila sa Caasinan Beach, sa Cabadbaran City ning nakalabay nga adlaw.
Sa eksklusibong pakighinabi sa Bombo Radyo Butuan, gipadayag ni Jaylee Ann Baldivino, inahan sa 9-anyos nga batang si Jayden , nangaligo ang ilang pamilya kauban ang mga pamilya sa ilang mga lechonero kondiin duna sila’y programa ug parlor games nga naghatag og lingaw sa kadaghanan samtang ang ubang bata nangaligo sa mabaw nga bahin sa maong baybayon.
Nagdula matud pa og sand castle ang iyang anak dihang namatikdan niining adunay nagkapa-kapa sa paglangoy nga bata ug kamot na lang ang nakita niini.
Walay pagduha-duha ang iyang anak og daling gilangoy ang nalumos nga bata kodiin hapit pa sila mi-unlod tungod sa tinguha sa iyang anak nga maluwas ang nalumos nga bata.
Daling gibira sa iyang anak ang biktima padulong ngadto sa mabaw nga bahin hangtud nga nakabantay na usab ang ubang mangaliguay ug gitabang na sila. Gikasab-an pa niya ang iyang anak sa pagtoong nagboot-boot kini og ligo sa lawum nga bahin.
Daku niyang kalipay nga daghay nakakita nga giluwas sa iyang anak ang nalumos nga kaduwa subay na usab sa saysay niini.
Dugang pa ni Jaylee Ann, 5-anyos pa lang ang iyang anak nga si Jayden, gi-enroll na niya sa Summer Swimming Classes aron makamao kining mulangoy kung mangaligo sila og dagat.
Awhag na lang niya sa mga ginikanan nga bantayan gayud ang mga bata ilabina kung mangaligo og dagat.
Nanawagan usab kini sa uban nga kinahanglang adunay stand-bye lifeguard sa matag beach resort arun maoy musanong sa mga insedente sa pagkalumos.
