BUTUAN CITY – Misaka na sa walo ka mga tawo ang namatay sa nahunlak nga bukid sa basura sa Binaliw landfill sa Cebu City human marekober ang laing duha ka patayng lawas sa nagpadayong search and rescue operations samtang padayon pang gipangita ang laing walo uban sa tabang sa 38 ka personahe sa Philippine Army gikan sa 525th Engineering Battalion ug CBRN Troops.
Sumala ni Councilor Dave Tumulak, adunay mga structural beams nga nakababag sa lugar mao nga naggamit ang mga rescuers og angay nga mga kagamitan aron matangtang ang maong mga sagabal.
Giklaro usab niya nga search and rescue mission gihapon ang operasyon ug wala pa kini gikonsidera nga recovery operation.
Samtang niini, gipadayag ni Mayor Nestor Archival Sr. nga kinahanglan manubag ang DENR sa mga paglapas sa regulasyon nga may kalabotan sa landfill kondiin wala gilayon napasira sa lokal nga panggamhanan ang pasilidad tungod kay adunay environmental clearance nga gipagawas ang DENR.
Ang landfill nga ginadumala sa Prime Integrated Waste Solutions Inc. (PIWS) nahunlak niadtong Enero 8, hinungdan sa pagkamatay sa mga mamumuo bisan pa sa mga reklamo ug pasidaan gikan sa lokal nga mga opisyal.
Dugang pa sa alkalde, katungdanan sa DENR nga manguna sa imbestigasyon ug pagdesisyon mahitungod sa operasyon sa maong pasilidad.
