BUTUAN CITY – Gimanduan na sa Office of the Ombudsman si Vice President Sara Duterte ug lain pang siyam ka mga opisyal gikan sa Department of Education ug Office of the Vice President nga magsubmite sa ilang tubag kalabot sa alegasyong sayop nga paggamit sa confidential funds.
Gihatagan lamang og napulo ka adlaw ang nasangpit nga mga respondents paghatag sa ilang counter-affidavit ug uban pang dokumento, sama sa saysay sa ilang mga saksi gikan sa adlaw dihang ilang nadawat ang nasangpit nga mando.
Pagklaro sa Ombudsman nga sama ra nga gibale-wala sa kampo ni Duterte ug uban pang mga damay sa isyu ang ilang katungod nga makapakita sa ilang mga ebidensya ugaling dili nila mahatag ang gipangayong tubag sulod sa napulo ka adlaw.
Dugang sa ahensya, bisan og dili mahatag sa mga indibidwal ang nasangpit nga mga papeles, magpadayon gihapon ang imbestigasyon. Lakip sa mga kasong gipasaka sa Kamara batok kang Duterte ang plunder, technical malversation, falsification, bribery, perjury, ug paglapas sa Konstitusyon.
May kalabutan kini sa sayop matud pang paggamit sa ₱500M confidential funds sa OVP ug ₱112.5M sa DepEd gikan niadtung tuig 2022 hangtud 2024.
Lakip sa mga imbestigahan ang mga opisyales sa DepEd nga sila Edward Fajardo, Gina Acosta, Atty. Sunshine Charry Fajardo, Maj. Gen. Nolasco Mempin (ret.), ug Undersecretary Annalyn Sevilla.
Imbestigahan usab ang mga opisyal gikan sa OVP nga sila si Atty. Zuleika Lopez, Lemuel Ortonio, Lt. Col. Dennis Nolasco, ug Col. Raymund Dante Lachica.
