BUTUAN CITY –Posibleng mosulod pag-usab sa Philippine Area of Responsibility (PAR) karong gabie, Domingo, o kaha ugma sa buntag, Lunes, Hulyo 7 ang Tropical cyclone Danas (kanhi Bising), sumala sa Philippine Atmospheric, Geophysical and Astronomical Services Administration (Pagasa).
Sigon sa state weather bureau, katapusang nasigpatan ang sentro sa maong bagyo sa gilay-ong 385 km sa amihanan-kasadpan sa Itbayat, Batanes. Dala niini ang hangin nga mokabat sa 120 km/h ug pagbuylo nga mokabat usab sa 150 km/h. Padayon usab kining naglihok pa-amihanan amihanang-sidlakan sa dagan nga 10 km/h.
Nagpasidaan usab ang weather bureau sa pagsaka sa gale warning sa mga kabaybayunan sa Amihanang Luzon, partikular sa Batanes, Babuyan Islands, ug Ilocos Region, diin mamahimo matud pang mosaka ang mga balod ngadto sa 4.5 metro.
Tungod niini, gitambagan usab ang mga mangingisda nga dili una managat arun malikay sa disgrasya.
Subay sa datus sa Office of Civil Defense (OCD), mokabat matud pa sa 13,006 ka mga indibidwal gikan sa Ilocos Region, Cordillera Administrative Region (CAR), ug Cagayan Valley ang apektado sa maong bagyo, samtang wala usay namatay, ug padayon ang gihimong clearing operations sa mga dili pasableng kalsada.
