BUTUAN CITY – Gisaulog kagahapong adlawa sa Surigao City ang ika-81 nga anibersaryo sa makasaysayanong Battle of Surigao Strait, ang katapusang surface gun battle tali sa mga battleship sa tibuok kalibutan, pinaagi sa usa ka halangdon nga seremonya nga gitambongan sa mga lokal nga opisyal, mga ahensya sa gobyerno, ug mga international delegates gikan sa Japan, Australia, ug Estados Unidos.
Ang engkwentro nahitabo niadtong 1944 atol sa Leyte Gulf Campaign, diin na-unlod ang tulo ka destroyers sa Imperial Japanese Navy, ang IJN Yamagumo, IJN Michishio, ug IJN Asagumo, samtang naningkamot nga makalusot paingon sa Leyte. Gipahimuslan sa U.S. Navy ang ilang radar advantage ug ang taktikang “Crossing the T,” kansa naghatag og estratehikong bentaha sa Allied Forces ug nanguna sa kadaugan sa maong gubat.
Mipadayag usab og mensahe si Naval Task Force 71 Commander CAPT Archibald Dino Delfin sa paghandom sa maong gubar. Sumala niini, kini usa ka mahinungdanong aktibidad alang sa paghandom sa kasaysayan.
Gipabuto ang 21-gun salute isip pasidungog sa mga sundalong namatay, isip paghatag og dakong pasidungog sa ilang kaisog, sakripisyo, ug kabililhon sa kalinaw nga gibilin sa kasaysayan.
Gitambongan ang okasyon sa kapin 30 ka mga Japanese delegates, mga representante sa Australian ug USA Embassy, Philippine National Police, Philippine Navy, Philippine Coast Guard, Bureau of Fire Protection, Boy Scouts, Girl Scouts, mga beterano, ug ubang sektor sa komunidad. Samtang sa iyang welcome message, gipadayag ni Australian Ambassador Marc Innes Brown, nga ang maong paghandom, maghandom sa mga leksyon nga nakat-unan sa Ikaduhang gubat sa kalibutan nga naghatag og inspirasyon sa paghi-usa ug kagawasan sa nasod.
Ang maong selebrasyon, timaan sa pagpadayon sa paningkamot nga mapreserbar ang kasaysayan ug mapalambo ang kalinaw alang sa umaabot pang mga henerasyon.
