BUTUAN CITY – Walo ka mga personahe sa Butuan City Jail ug unom ka mga piniriso kon persons deprived of liberty kon PDL ang gi-isolate na human nagpositibo sa swab test alang sa makamatay nga coronavirus disease-2019 kon COVID-19.
Sa eksklusibong pakighinabi sa Bombo Radyo Butuan, gipadayag ni JSupt Bernie Ruiz, assistant regional director for administration and operation sa BJMP-Caraga, naningkamot silang makontrola ang problema sa coronavirus apan wala gyod sila milampos rason nga gidala na ang mga COVID-19 patients ngadto sa isolation center ning siyudad ug gi-atiman na sa mga personahe sa City Health Office.
Sigon ni Ruiz, una nilang nasubay ang positibong simtomas sa maong sakit gikan sa han-ay sa mga piniriso kon Persons Deprived of Liberty kon PDL rason nga ila kining gipa-ilalom sa swab test ug dinhi na nasuta nga unom kanila ang positibo sa maong virus.
Dinhi na dayon nila gimando ang mandatory lockdown sa tanan nilang mga personaheng anaa sa sulod sa ilang buhatan apil na niini ang nurses ug gisunod ang pag-swab test kanila pagpanguna sa Department of Health kon DOH-Caraga.
Hinuon wala kaayo maka-apekto sa ilang operasyon ang maong panghitabo tungod kay duna pa man sila’y igong mga personahe usab nga gihulip nila sa na-isolate nga walo.
Samtang gikan niadtong Marso 22 ning tuiga hangtod ning panahona pabiling ginadili ang pagbisita ngadto sa mga priso ug uban pa apan ugaling dunay mubisita igo lamang sa pagtunol sa mga gamit, medesina ug gamay nga kantidad nga magamit sa sulod.
Kadtong mga hearing sa korte usab gipaagi na lamang sa na-andan na karun nga virtual ingon man ang mga gustong muduaw mahimong magpa-eskedyul lang aron ma-arrange pinaagi lang sa virtual meeting.
