BUTUAN CITY – Mismong si Agriculture Sec. William Dar ang nag-una sa pagpang-apod apod sa walo ka mga hauling trucks nga gigahinan og 10.9 milyunes pesos ngadto sa mga farmers’ cooperatives ning rehiyon sa Cagara.
Apil sa nahatagan sa maong mga trak ang Lemon Integrated Farmers Association, Inc. sa Brgy. Lemon; Sto. Niño Multi-Purpose Cooperative sa Brgy; Sto, Niño; ug Km. 7 Farmers Producers Cooperative sa Brgy. Tungao nga pulos sakop ning siyudad sa Butuan.
Anaa pa ang Palasao Agriculture Cooperative sa Brgy. Calagdaan lungsod sa Cantilan ingon man sa Patong-Patong Farmers’ Agriculture Cooperative sa lungsod sa Madrid pulos sakop sa lalawigan sa Surigao del Sur.
Samtang sa Agusan del Sur, benepisyaryo niini ang Hike-ESFECO sa Brgy. Poblacion lungsod sa Esperanza; First Trento Community Multi-purpose Cooperative sa lungsod sa Esperanza ug ang Agus Pinoy Producers Cooperative sa Brgy. Pisaan lungsod sa San Francisco.
Gawas niini, nang-apod apod usab ang kalihim og nagkada-iyang environment-friendly fishing gears ug paraphernia aron gamiton ug ipatuman og sakto ang ilang nadawat ning adlawa sa ingon matabangan silang mapalambo og dyutay ang ilang panginabuhian ilabina ang matag-coop member.
Subay na usab kini sa pagsa-ulog sa Bureau of Fisheries and Aquatic Resources kon BFAR sa ika-56 nga kasa-ulugan sa Fish Conservation Week.
Gihimo ang turn-over sa mga environment-friendly fishing gears ug paraphernalia sa Brgy. Masao ning siyudad sa Butuan.
