BUTUAN CITY – Dili na magpasaka pa ug kaso ang pamilya sa 8-anyos nga batang lalaki nga naligsan-patay sa niaging alas 11:30 sa buntag sa may Bayugan City, Agusan Del Sur.
Kini human nagkasinabot ang pamilya sa biktimang si Arvin Kyle Manlapitao nga residente sa Purok Sta. Irene sa maong siyudad ug sa suspek nga si Robert Redon, 17-anyos, nga taga P-6, Bayugan City nga abagahon sa suspek ang galastuhon sa pamilya hangtud nga mahatud sa katapusang palahuyanan ang biktima.
Nasayrang nangaligo ang biktima kauban sa iyang barkada sa irrigation sa National Irrigation Administration kon NIA Dam sa maong dapit ug sa dihang pauli na ang magbarkada, nahitabo ang insedente.
Sumala pa sa saksi, kusog matud pang nagpadagan ang suspek sa iyang single motor rasong nabang-gaan ang biktima nga nakahiagum ug grabeng injury nga misangpot sa hinanaling kamatayon. (Rolan Janea)
