BUTUAN CITY – Pito ka mga tawo ang patay sa managlahing landslides sa Davao de Oro ug Davao Oriental, base na sa reports gikan sa ilang mga local government units.
Gikumpirma sa municipal government sa Monkayo, Davao de Oro, nga patay ang usa ka amahan ug duha niya ka mga anak nga lalaki human natabunan ang ilang balay gikan sa midahiling yuta pasado alas-11:40 kagabii.
Naghatag na og ayuda ang lokal nga kagamhanan sa Monkayo ngadto sa uban pang apektadong mga pamilya dayong panawagan sa mga residente nga anaa sa mga flood ug landslide-prone areas nga mag-amping ug magbinantayon kanunay aron makabakwit gilayon kung kinahanglanon.
Samtang patay nang narekober na ang upat ka miyembro sa usa ka pamilya sa Upper Salazar, Brgy. Central, Mati City human natabunan ka-uban ang ilang panimalay sa midahiling yuta kaganinang buntag.
Sa impormasyong nakuha gikan sa Bureau of Fire Protection kon BFP-Mati City, daling silang miresponde sa taho nga landslide sa maong lugar diin nasuta nga usa ka balay ang natabunan.
Gihimo ang rescue operation ug nakuha ang 40-anyos nga amahang si Habib Anting; ang 38-anyos nga mabdos nga si Kharen Anting ug ilang duha ka mga anak nga babaye nga 13-anyos og 5-anyos.
Nasayrang tungang gabii pa natigayon ang landslide dihang nangatulog ang mga biktima.
