BUTUAN CITY – Gikalipay sa Department of Education kon DepEd-Caraga ang malinawong pag-abli sa school year 2025-2026 kagahapong adlawa dinhi sa rehiyon ingon man sa tibook nasod.
Sumala sa tigpamaba sa maong ahensya nga si Pedro Tecson, wala’y nasinatian nga kakulian ang rehiyon sa pag-abli sa klase. Kini ilabina nga puno sa kaaligri ang unang adlaw sa klase ning rehiyon, ug excited usab ang mga magtutungha.
Apan taliwala sa ka excited sa ubang mga estudyante, duna gihapoy uban nga kinahanglan pang tabangan sa mga magtutudlo ilabina kadtung nakita sa gihimong mapping sa DepEd nga dili makabalik pagtungha tungod sa pinansyal nga kakulangon.
Saad sa opisyal, gawas sa gihimong mapping niadtung wala pa nag-abli ang klase, mohimo pa usab og dugang hugna sa mapping ang mga magtutudlo arun mas makita pa ang sitwasyon sa mga bata nga wala maka-eskwela kagahapong adlaw.
Ang pamahayag ni Pedro Tecson, tigpamaba sa DEPED Caraga.
Mudawat gihapon ang mga eskwelahan og mga late enrollees, ilabi na kadtung mga estudyante nga wala pa naka-process sa ilang mga papeles, ingon man kadtung mga estudyante nga mubalhin og eskwelahan.
Sa pagkakaron, nag-anam pa og saka ang ihap sa mga estudyante nga nagtungha, subay sa ilang tinuig nga listahan.
Giklaro usab ni Tecson nga dili pa mapun-an ang kakulangon sa classrooms dihni sa rehiyon sulod sa lima ka tuig kapin, ugaling mag-construct og classroom base sa tinuig nga target.
