BUTUAN CITY – Gikumpirma ni Kapitan Reneirio Salcedo sa Brgy. Lumbocan ning siyudad sa Butuan nga mu-abit sa 76 ka mga balay duol sa baybay gikan sa Purok 8 hangtud 12 ang apektado sa coastal road project sa city government.
Sa eksklusibong pakighinabi sa Bombo Radyo Butuan, gipadayag sa kapitan nga pila ka tuig na ang nakalabay dihang gipahibalo ang nasangpit nga mga residente aron mangita na sila og kabalhinan.
Kagahapon, nakurat na lang ang mga residente human nga gisugdan na pagtambak ang ilang lugar nga mimugna og gamay nga komosyon.
Giklaro sa kapitan nga wala’y demolisyon nga mahitabo tungod kay wala may order sa korte nga gipagawas, hinuon ang notice lang gikan sa city government nga nagpahibalo kanilang biyaan na ang lugar nga gitarukan sa ilang balay tungod kay ma-igo kini sa maong proyekto.
Kaganinang alas-tres kapin sa hapon, nag-meeting ang mga residente ka-uban ang mga barangay ug city government officials, aron hisgutan ang mga angayang buhaton ilabina ang pag-relocate sa mga apektadong residente.
Misaad ang kapitan nga paningkamutan niyang adiser maguba ang maong mga balay, duna na sila’y kabalhinan.
Gani siya matud pa mismo ang maningkamot nga dili una padali-dalion og guba ang mga balay pinaagi sa pagduol niya sa city government.
