BUTUAN CITY – Ubay-ubay nga mga pocket events ang gikahan-ay na sa lokal nga kagamhanan sa Cloud 9 sakop sa lungsod General Luna, Siargao Island, Surigao del Norte human nila pormal nga gibuksan kagahapon ang 26th Siargao International Surfing Festival 2022 pagpanguna ni Tourism Sec Cristina Garcia-Frasco.
Sa eksklusibong pakighinabi sa Bombo Radyo Butuan, gipadayag ni Perl Arienza-Jacalan, ang Media Relations Officer sa Siargao Surfing Festival, usa ka gatus ka mga surfers gikan sa nagkada-iyang panig sa kalibutan ang milambigit sa maong kalihukan kondiin 40 niini mga Pinoy nga gikan sa nagkada-iyang panig sa nasud samtang kapin sa 50 usab ang mga foreign surfers.
Bongga ang gihimong opening ceremony sa may Boulevard tungod kay kini na matud pa ang sinugdanan alang sa hingpit na unyang pagrekober sa turismo sa nasangpit nga isla human na-igo sa COVID-19 pandemic ug sa bagyong Odette.
Apil sa mga pocket events atol sa surfing competition period, ang night market, Siargao Sound System, Siargao Arts and Cultural Show, Camping Siargao, pag-organisa og surfing master class alang niadtong gustong makakat-on og surfing.
