BUTUAN CITY – Mi-abot na sa 70 ka mga public schools dinhi sa dakbayan sa Butuan ang nag-shift na sa ilang face-to-face classes ngadto na sa modular distance o blended learning tungod sa padayong taas nga heat index.
Sigon ni Emilio Makiling, ang disaster risk reduction and management office coordinator sa Department of Education kon DepEd-Butuan City Schools Division, gawas sa taas nga heat index, anaa pa ang kadaghan sa mga estudyante rason nga kinahanglan gayod nga bahinon aron mas mahimo pang conducive ang pagkat-on sa mga bata diha sa ilang mga lawak-tunghaan.
Nadesisyunan ang pagpatuman sa blended learning aron malikay ang mga magtutungha nga ma-heat stroke tungod sa grabe kataas sa init sa adlaw kondiin duna na’y mga magtutungha nga gipangsunggo.
Sama matud pa kung duna’y bagyo, gitugutan na usab sa DepEd ang mga school principals nga magdesisyon kung ila na bang adaptahon kung magpatuman na ba sila og blended learning tungod kay sila man mismo ang makasinati sa temperatura sa ilang tagsa-tagsa ka klase.
Wala matud pa sila’y angayang kabalak-an tungod kay suportado man sa mga ginikanan Parents Teacher’s Association kon PTA.
Ila usab nga hingusgan nga ibalik na sa Hunyo ang pagbukas sa school year aron dili na magproblema sa ilang pagtuon ang kabataan.
