BUTUAN CITY – Giplastar na ang mga dokumento sa pagpasaka og kaso batuk sa responsable sa pagpamusil-patay ngadto sa 70-anyos nga lola kaganinang alas 7:00 sa buntag sa bukirang parte sa Purok-20, Barangay Poblacion sa Prosperidad, Agusan Del Sur.
Naila ang biktima nga si Eufemia Pugahan, 70-anyos, menyu samtang ang suspek nailang si Mike Guibao, 34-anyos, menyu nga residente usab sa maong dapit.
Sigon ni Police Lt. Col Wilson Curpoz, hepe sa Prosperidad Municipal Police Station sa ekslusibong pakighinabi ning sibyahan, nga samtang nagbantay ang biktima sa iyang tindahan, kalit kining gidool sa suspek og gipusil sa makadaghang higayon gamit ang armalite.
Naigo ang biktima sa liog, tiyan, tiil og dughan rason sa hinanaling kamatayon niini.
Narekober sa dapit nga nahitaboan ang usa ka M16 rifle, og 13 ka basyu sa bala. Sa gihimong hotpursuit operation sa kapulisan nadakpan ang suspek.
Sumala pa ni Police Lt. Col. Curpoz nga base sa pamahayag sa suspek, hilabihan ang kasuko niini sa maong tigulang tungod sa iyang pagtoo nga kini ang nagbarang sa iyang inahan. Gisuta sa karun kung asa nakakuha og armas ang suspek nga usa ka bodyguard.
