BUTUAN CITY – Nadugang ang usa ka experto sa paghimo og bomba sa mga misurender nga rebelding New People’s Army kon NPA ngadto sa 75th IB headquarters sa Brgy Maharlika, Bislig City, Surigao del Sur sa nakalabay nga adlaw.
Naila kini nga alyas Junio sa Guerilla Front 14, North Eastern Mindanao Regional Committee.
Bitbit niini sa iyang pagtahan ang usa ka kalibre 45 nga pistola nga dunay usa ka magazine nga puno sa 5 ka buhing bala ug usa ka 357 revolver nga dunay 4 ka buhing bala.
Una nang mitahan sa 75th IB ang unom ka rebelde nga gilangkuban nila Alyas Bong, Alyas Pat, Alyas Adan, Alyas Shiela, Alyas Bugoy, ug Alyas Galo.
Bitbit usab sa ilang pagsurender ang usa ka M4 Carbine; duha ka cal.45 pistol; usa ka M16A1, usa ka M653 assault rifle; upat ka rifle grenade; walo ka 40mm high-explosive (HE) ammunition; 11 ka steel short magazine; usa ka plastic short magazine; 105 ka buhing bala sa 5.56mm; 29 usab sa cal.45, ug tulo ka bandoliers.
