BUTUAN CITY – Gikabalak-ang madugangan pa ang 7 nga natalang patay tungod sa diarrhea outbreak sa pipila ka mga lungsod sa Siargao Islands sa Surigao del Norte partikular sa mga lungsod sa Dapa ug General Luna.
Sigon ni Bombo Siargao correspondent Alexander Moral, ang maong ihap, base na usab sa pagkumpirma sa besi mayor sa General Luna kondiin 60-porsiento sa 130 ka mga biktimang na-ospital, gikan sa maong lungsod.
Sigon ni Moral, tungod matud pa kini sa kawala’y igong kakuhaan og limpyo nga tubig ma-inom ilabina nga 98-porsiento sa kinatibuk-ang isla ang nadamyos.
Sa pagkakaron, duha ka mga water sources lang ang gisaligan sa katawhan sa maong lungsod kondiin ang usa mao ang water refilling station sa lungsod sa Dapa samtang ang laing usa, didto sa Brgy.Sayak sa lungsod sa Del Carmen.
Tungod sa kadaghan sa mga manginahanglan og tubig, kulangon pa kini rason nga gila-umang musaka pa ang ihap sa mga ma-ospital tungod sa diarrea ug sa posible pang casualties higayong dilli pa gihapon mahatagan og limpyong tubig ma-inom ang katawhan.
Subo matud pang pamalandungon nga tungod sa kadaghan na sa mga nawad-an og panimalay, daghan na sa katawhan sa isla ang nagka-sun burn tungod sa kawala’y mapasilungan.
Kini tungod na usab sa pagkapamatay na sa tanang mga kahoy ug mga pananom nga tungod sa kakusog sa hangin, nangapilay ang mga dahon ug nangabali pa ang mga sanga ug nanga-ibot pa ang uban.
