BUTUAN CITY – Miabot sa 7 katawo ang namatay sa pagdahili sa yuta sa barangay Labang sa lungsod sa Ambaguio, Nueva Vizcaya tungod sa pagkuso-kusog sa super bagyong Pepito niadtong Domingo sa gabii.
Sumala sa Provincial Disaster Risk Reduction Management Council (PDRRMC), natabunan ang balay sa magkapamilya nga anaa sa kilid sa bukid tungod sa natigayong landslide. Pinakabata sa mga biktima mao ang 8-anyos nga babaye.
Ang mga biktima natulog sa pinuy-anan ni Brgy. Kagawad Selo Calanhi sa dihang natigayon ang landslide og natabunan ang pinuy-anan.
Swerte usab nga nakaluwas sa maong landslide ang laing tulo ka mga miyembro sa pamilya lakip na ang kagawad bisan og natabunan usab ang ilang balay.
Sigon ni Gov. Jose Gambito, Biyernes pa lang nagpahimangno na sila para sa evacuation apan nakuratan matud pa ang tanan tungod kay bisa ang dili mabahaang lugar, nasudlan na sa taas nga lebel sa tubig.
Nasayran nga daghang dike ang naguba usab, lakip na ang natumba nga mga poste, namatay ang mga binuhing hayop ug dili pa maihap nga mga balay ang naguba.
Samtang usa ang natalang namatay sa bagyong Pepito gikan sa Camarines Norte. Padayon usab ang monitoring sa NDRRMC.
