BUTUAN CITY – Dakong leksiyon alang sa tanang kapulisan ning rehiyon sa Caraga ang pagkatanggal sa 7 ka mga pulis human nalambigit sa kasong robbery in band niadtong Enero 2022 sa Agusan Del Sur.
Sigon ni PMaj. Dorothy Tumulak, tigpamaba sa Police Regional Office kon PRO-13, walay kukalooy gayud si Brigadier General Romeo Caramat Jr., regional director sa Police Regional office kon PRO-13 sa mga pulis nga malambigit sa ilegal nga kalihukan og naghugaw-hugaw sa han-ay sa Philippine National Police.
Sumala pa ni Pmaj Tumulak nga ingon niini nga kahigpit sa pagdisiplina si RD Caramat Jr ngadto sa iyang kapulisan. Maong tambag nalang niini sa tanang kaubanan nga mubuhat sa unsa may gipanumpaan.
Mahinumdumang base sa gipagawas nga Special Order sa Police Regional Office 13 nga pinirmahan ni Colonel Dennis Sirruno, chief sa Regional Personnel and Records R1, gidismiss sa serbisyu sugod niadtong Marso 30, 2022 ang mga musunod nga sakop sa Intelligence Branch sa Agusan del Sur Provincial Police Office: Lt. Colonel Jared Charles Joaquin, PSms Ronald Laro, PSsg Lolito Valdez, PSsg Richard Ayala, PSsg Darryll John Mozo, Pat Sebastian Batausa sa Agusan Sur Mobile Force, Pat Ivan Klein Osorio sa Agusan Sur Mobile Force.
Ang nasangpit nga mga pulis gialegahan sa usa ka Jasper Pabilic, negosyante sa Lapnisan nga nalambigit sa robbery in band, sa dihang gidakop ang maong negosyante sulod sa usa ka simbahan sa may Trento, Agusan del Sur.
Gitanggal ang mga niini human nga napamatud-an sa kasong grave misconduct, grave neglect of duty, grave irregularity in the performance of their duty ug unbecoming of a police office nga na docket sa Regional Internal Affairs Service RIAS13 NMP 2022 001.
Gawas sa pagkatanggal dili na usab sila mamahimo pa manarbaho sa gobyerno lakip na ang forfeiture sa ilang benipisyo.
