BUTUAN CITY – Grabe nga kasubo ang gibati karon sa pamilya Maglente tungod kay dili na nila maka-uban karong Pasko ang pito ka membro sa ilang pamilya human nangamatay dihang mibangga ang ilang gisakyang L300 van sa usa ka punuan sa kahoy dihang kilom-kilom na kagahapon, didto sa Brgy. Magsangyaw, lungsod sa Tupi, South Cotabato.
Nasayrang gikan ang mga biktima sa usa ka photo shoot sa Magsangyaw Land of Praise tourist spot ug pa-uli na unta dihang wala na matud pa mikagar ang brake sa sakyanan samtang palugsong kini rason nga nabangga sa usa ka punuan sa kahoy resulta sa pagpangalagpot sa tanang sakay niini apil na ang driver nga nataban pa ang bangko sa iyang pagkalabay.
Gideklara sa mga emergency responders nga dead on arrival sila Annabelle Maglente, 52-anyos; Joan Maglente, 28; Joel Maglente; Duke Maglente; ug Ike Maglente, pulos taga-Cagayan de Oro City ug mibakasyon lang sa Polomolok aron didto unta mag-Pasko samtang apil sa namatay ang mga bata nga sila Marga, 7-anyos ug Yuna, 8-anyos nga residente sa Polomolok.
Bugtong naluwas sa aksidente ang driver nga si Oliver Maglente, kinsa naka-angkon og daghang injuries ug padayong giambalan.
Gidala na ang mga patay’ng lawas sa morgue sa Tupi Municipal Hospital aron mabalsamar samtang padayon usab ang lawom nga imbestigasyon sa maong insidente.
