BUTUAN CITY – Mi-abot na sa 177 ang kinatibuk-ang namatay sa Caraga Region tungod sa COVID-19 human kini nadugangan og pito kagahapong adlawa apil na niini ang unom gikan sa unang mga nakumpirmang kaso.
Sa virtual presser sa Department of Health kon DOH-Caraga kaganina, apil sa mga namatay ang 81-anyos nga lalaking taga-Nasipit, Agusan del Norte nga duna’y sakit sa baga, balik-balik nga hilanat, ubo, liso nga pagginhawa ug luya nga lawas niadtong Nobyembre 17 rason nga gi-admit sa ospital paglabay sa duha ka mga adlawa apan tungod sa mga komplikasyon namatay kini pagka-Nobyembre 22.
Ang ikaduhang namatay mao ang 80-anyos nga lola sa Placer, Surigao del Norte kinsa nawad-an og gana sa pagkaon niadtong Nobyembre 16, gi-admit pagka-Nobyembre 22 apan namatay pagkasunod adlaw.
Ang ikatulong namatay mao ang usa ka 60-anyos nga babayeng gikan sa Surigao City kinsa hypertensive ug diabetic ug pagka-Okubre 26 balik-balik nga gihilantan, gi-ubo ug nawad-an og panglasa hangtud nga gi-admit na pagka-Okubre 28 apan tungod sa mga komplikasyon, namatay kini pagka-Nobyembre 18.
Ang ika-upat nga nakalas mao ang 81-anyos nga lolang taga-Placer, Surigao del Norte kinsa wala’y comorbidity apan gi-ubo niadtong Oktubre 18, gi-refer sa usa ka health faciity apan namatay pagka-Nobyembre 1.
Ang ikalima mao ang 70-anyos nga hubakong lola sa Surigao City kinsa gi-ubo ug naglisod og ginhawa niadtong Oktubre 24 dayon gi-admit pagka-Oktubre 31 apan tungod sa mga komplikasyon namatay pagka-Nobyembre 21.
Samtang ang ika-unom nga namatay mao ang 67-anyos nga lalaking taga-Surigao City nga wala’y comorbidity kinsa gi-admit niadtong Oktubre 29 human gihilantan niadtong Nobyembre 1 apan namatay pagka-Nobyembre 22 tungod sa mga komplikasyon ug ang katapusang namatay mao ang 66-anyos nga lalaking taga-Nasipit, Agusan del Norte kinsa hypertensive ug diabetic, gi-ubos og naglisod pagginhawa niadtong Nobyembre 26 ug gi-admit pagka-Nobyembre 30 apan namatay kagahapong adlawa.
Sa kasamtangan, mi-abot na sa 3,796 ang cumulative COVID-19 confirmed cases ning rehiyon human nadugangan og bag-ong 26 ka mga kaso, kondiin 483 niini ang mga aktibong kaso ug 3,136 ang nakarekober.
