BUTUAN CITY – Miabot na sa pito ang gidaghanon sa mga namatay ug pito usab ang nasamdan sa pagkuso-kuso sa bagyong Basyang sa Northern Mindanao.
Sumala ni Director Antonio Sugarol sa Office of the Civil Defense (OCD) Region 10, upat ka tawo ang kumpirmadong namatay tungod sa pagdahili sa yuta sa Barangay Agusan, Cagayan de Oro City samtang sa listahan sa mga angol, duha niini gikan sa Cagayan de Oro, tulo sa Gingoog City, ug duha sa Iligan City samtang usa ang missingsa Tagoloan, Lanao del Norte.
Una nang gitaho sa Public Information Officer sa Iligan City Police Office nga tulo ang namatay sa ilang siyudad, apan wala pa kini makumpirma sa OCD-10.
Lakip niini ang usa ka tigbalita nga gi-atake sa sakit sa kasing-kasing human nabahaan ang ilang panimalay, ug duha ka patay’ng lawas nga narekober gikan sa suba.
Sa kinatibuk-an, labaw sa 40,000 ka pamilya ang naapektuhan sa bagyo sa Northern Mindanao. Ang mga apektadong pamilya nabigyan og food ug non-food items gikan sa Department of Social Welfare and Development (DSWD).
