BUTUAN CITY – Wala na’y kinabuhing napalgan nga naglutaw sa dagat sa Purok Santan, Brgy Bungtod, Tandag City, lalawigan sa Surigao del Sur ang usa ka 6-anyos nga batang babayeng autistic human kini nakagawas sa balay sa iyang igsoon, sulod lang sa pipila ka minuto.
Sigon sa bayaw sa biktima nga si Kimberly Jean Reston, mi-laag matud pa sa ilang balay ang biktima ug igsoon niini pasado alas-kwatro kagahapon sa hapon kondiin paglabay sa usa ka oras, iyang gisugo ang igsoon sa biktima nga magpalit og snack.
Pasado alas-sais na kagabii nilang nabantayan nga nawala na ang biktima rason nga ila kining gipangita sa dike nga anaa lang gawas sa ilang balay ilabina sa parte nga paborito niining duwaanan.
Minutos lang matud pa ang milabay dihang nakit-an na ang biktima nga naglutaw na sa dagat.
Gitu-uhang nadakin-as o kaha nadala kini sa paghapak sa dagkong balud nga mugna sa bagyong Basyang.
